سارّة تونس،،، للشاعر محمّد مامي

                           سَــــــارّة تُــــــونــــس

أسْــمَـــرْ وَ فِي نِـسـِبْـتِـي مَا نْــدَرِّقْ         

و الأصْـل ثابِتْ كُـنْـيِتِـي الْـمْـوَفِّــقْ

وِلْـدِ الْجَـنُـوب  نَا وِجْهِـتِي لِلْمَـشَـرّق        

ولْـدِ الْفَـيَافِي مَـسِـكْـنِـي و مِـيـلاَدِي

كَـسْـبِـي حْـلاَلْ و رَبْـنَـا مِـنْ يِـرْزِقْ         

بَابِ الطِّـمَعْ مَنْكُـورْ فِي مِي عَـادِي

                           **********

تَارِيـخْ حَافِـلْ لَأَهْـل بـِنْ قِــرْدَانْ            

نَـاسْـهَـا نْـشَـامَـة و فُـرْسَـانْهَا شُجْعَانْ

لَـو تِـسْـألُـوا دِرْنَـة مَـعَ الـزِّنْـتَـانْ            

و مَـمَـرْ رَاسْ جْـدِيــرْ شَاهِــدْ بَـادِي

مِنْ طَبَعْـنَـا نْقِـيـمْ فَـرْح  لِلضِّيفَانْ           

و نِـبْـنِي قْـبَـرٍ لْـمِـنْ قَصَدْنَـا مْعَـادِي

                           **********

قْـلِـيـلْ لَـحْـيَـاء في أَرِضْـنَـا مُـهَـانْ          

تْـرابْ وَطِـنْـنَـا لاَ يْفَحِّـجُـو خَـــوَّانْ

وَ مِنْ باعْ وَطْـنُو جِلْـفْ مِالجِّـرْذَانْ          

نَـاقِصْ عْقَـل طَلْفَـاحْ عَاشْ يِـــدَادِي

حَــرِّفْ السُّـنَّــة زَادْ أَوَّلْ الْـقُـــرْآنْ          

و أَفْعَالْ شِـينَة مَـعْـرُوفْ عَنُّوسَادِي

                           *********

مَعْـتُــوهْ لاَ لُو دْوَاء بَـالِـغْ مَــرْضُـو         

مِنْ أَجْـل حُـورْ الْعِيـنْ يَنْـسَى فَرْضُو

لاَ هِمَّـتُو  فِي شْـرَفْ لاَ فِي عَرْضُو         

نَـاسِـي أُصُـولِ الْعُـرْف و الْمَـبَـادِي

شُـفْــنَـاهْ بِالـدُّولاَرْ بَـايَــــعْ أَرْضُــو        

عَايِشْ هْـمِيلْ فِي جُحْـر وَحْدُو فْـرَادِي

عَـايِـشْ حْيَـاتُـو في الدَّرَكْ مُـهَــانْ          

خِنْزِيـرْ شَارِدْ في الأرْض لا لُو مْكَانْ

الرّاسْ غُوفَـة و لِحْـيَـة كْمَا الجِّدْيَانْ         

حْـبُـوبْ هَـلِـوْسَـة تَخْـدِيـرْ لِـلأَوْغَـــادِ

الْبَطـن فَاضِـي و الِكْـرَعْ حِفْيَانْ             

و شُـرْبُـو مْـدَرْدِرْ فـي غْــدِيــرِ الْوَادِ

                           **********

مَبْرّوكْ قَالْ في الحُبْ لاَ لِـي حْدَادَة          

و تُـونِـسْ عَـصِـيّـة حاضْنَـة ولاَّدَة

رافِــدْ شْـرَبْـتُـو فِـي رْضَـاعِـة دَادَة          

هْـوَاهَـا يِـبْـرِي جْوَارْحِي و افَّـادِي

جا عِـشِـقْـهَـا يا نَاسْ منْ غِيـرْ رَادَة         

فَاقْ فَضـلْهَـا بَاشْـوَاطْ حُبْ أَوْلاَدِي

                           **********

عْـلـى حُبْـهَـا في صُغِـرْتِي رَبِّتْنِـي          

بْـنَبْـعِ الْحَنَـانْ حَسِّـيـتْ كِ حَضْنِتْنِي

دْرُوسِ الشَّهَامَة حْفَظْـت كِ قَرِّتْنِي           

نَـحْـرِصْ نْكُونْ فْـحَـلْ بِيـنِ أَنْدَادِي

مَعْـلُومْ وَطْنِـي يِكُونْ سابِـقْ بَطْنِي           

رُوحِي تْهُـونْ نْصُونْ أَرْض أَمْجَادِي

                           **********

بْكِـنْـزِ لِمْحَـبَّـة اليُومْ فَاضْ إِحْسَاسَه          

هَا هُو أَعْطَاكُـمْ دَرْس آهْ يَـا سَـاسَـة

عالضِّيمْ صَابِر مَا هْواشْ مِالْبَزْنَاسَة    

وْرَاء الْقُـوتْ يِجْرِي في حَضَرْ و بْوَادِي

و مْـنَـحْ كِبْـدُو صَادْفِتْهَـا رْصَـاصَـة         

رَافَـعْ شِـعَـارْ بْـلاَدِي قَـبْــل أَوْلاَدِي

                           **********

صَـادِقْ كْـلاَمُو تْـقَالْ بْلاَ خَـلْـفِـيَّـة           

لاَ وْرِدْ فْ بَرْلَـمَـانْ وَ لا فْ كُلِّـيَّـة

و لا طَـالِبْ بِـزْيَادَاتْ في شَهْـرِيَّة           

صُونُوا بْلادْ اللِّي حَرِّرُوهَا أَجْدَادِي

و تَـاجِ الْوَطَـنْ مِـعْـرَاجْ لِلْـحُـرِّيَّـة           

تُـونـس أمَانَـة و تْصُونْـهَـا أَحْفَادِي

                          

اللّـهْ يَرَحْمِـكْ يَـا سَـارَّة أنْتِ مْشِيتِي         

و لَوْ لاَ الحُرْقَـة يا دَمَعْتِـي ما جْرِيتِي

أنْت الشَّـهِيـدَة في السَّمَـا تْـعَـلِّـيـتـِي          

و رَبِّ الْوُجُـودْ جَـلاَّكْ هُـوُ الْـهَــادِي

و اليُـومْ نَا حـجِّيـتْ و أَنْتِ أَهْدِيتِي          

و تَحْـيَا تُـونِـسْ و الصَّبْـر يبْقَى زَادِي

                            الشّـاعـر: مـحـمّـد مـامــي              

 تستـــور في 8 مـارس 2016

الشاعر محمّد مامي