 |
| أسماء بن يعقوب |
بين الزّنڨة والزّنڨة حرف...
بين الزّنڨة
والزّنڨة حرف...
والشّارع
يروي في الحكاية بالطّرف بالطّرف...
الغيرة تذهب الشّيرة
والخبيث
زايد عليك عام وحيلة ...
الذّيب ڨدام الصّيد لبوة
والكلب ما
ينبح كان فوڨ الرّبوة...
الخوف مَاكِنْ بْنَادِمْ من راسا
لطراطش ساڨيه.
يحلّ الظّلام
ما تسمع كان دڨّات القلب ورجفان يديه
لا ينحّيه
صوردي ولا كثرة امّاليه
كالڨبر ، ظلام
حالك، وما ينفعه كان الّي يرحّم عليه .
الرّيڨ شايح
الصوت خايخ
الهم بين
الجرود فايح
والعبد بين
الشهاوي ضايع
الحبّ...
إلّي يبغيه
ما يسلّم فيه والّي يحاذيه ما يفهم سرّو من حلّة عينيه...
العشڨ
عالڨلب رزين
والّي حلفت
عليه النّسوة بيمين
ينسى النّوم ويعيش بين السّاڨين
مذموم
مذلول
بين الكتب يصول ويجول
يولول ڨصايد ويزرع نعناع ويازول
ويشڨ خلاها وع الناس يغور
هايم بالوجيعة مزطول.
والحبيب يلالي من سماء ونجوم...
كلّ شيّ بالسّيف كان العشڨ بالكيف.
بَصْمتكْ
فالكِنين ما مَرّها
والشُّون إلّي
رْفِدْ هدارِيكْ خلّيت فيه جمرة ما حرّها.
بين النّخل ضلايل، نْحت بترابها ڨصايد
رثيتْ فيها الفراڨ بعد الزّاير
بين خْطاويك تدعثرتْ، ولْحكم الزّمان تنكّرْت
ڨلت ليَمّا ڨلبي السّخيف متيّم ، والهمّْ بالجّواجي مغيّم،
لا من
صُوبنا ولا من دارنا ولا حوشنا
ولا ولد
عمّي شُڨّة
ولْهانة
مالشّوڨ
دايرة عينيه ڨِبلة
ولمِنْ
نِشْبحَه ندير الصّلاة سِبْلة
رىحتَه سُنّة محمّد، والماء بحضورَهْ يتجمّد،والڨلب مْحاذِيه متْعمّدّ .
ومشاوير
الزّمان مودّيتنا لوادْها ، يجْرف احلامنا والّي حْكامها ما رادَها.
والڨُمر غايبْ
وصڨيع الوحش
ذايبْ
وانَا بموّالي نغْزِل بيُوت
بَصْمتكْ
فالكِنين ما مَرّها
والشُّون الّي
رْفِدْ هدارِيكْ خلّيت فيه جمرة ما حرّها
وبين الزّنڨة والزّنڨة حرف...
والشّارع
يروي في الحكاية بالطّرف بالطّرف...
أسماء بن يعقوب
من مجموعة "سيّدة الكلمات"
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.